គោលការណ៍ណែនាំសហគមន៍

សូមស្វាគមន៍មកកាន់ Tinder!
Tinder គឺជាកន្លែងដែលអាចកសាងទំនាក់ទំនងដ៏មានន័យបាន។ វាចាប់ផ្តើមជាមួយនឹងការអូស។ ពេលខ្លះអ្នកត្រូវគ្នា ពេលខ្លះមិនត្រូវគ្នា។ ហើយពេលខ្លះការនិយាយគ្នាធ្វើឲ្យមានអ្វីលើសពីហ្នឹងទៀត។ ឱកាសមានច្រើនលើសលុប។ រឿងដែលអាចទៅរួចគ្មានដែនកំណត់ទេ។ សូមស្វាគមន៍ (មនុស្សពេញវ័យ) គ្រប់រូបក្នុងការចូលមកប្រើប្រាស់កម្មវិធីនេះ។

យើងចង់ឲ្យ Tinder ជាកន្លែងដែលផ្តល់ភាពរីករាយ មានសុវត្ថិភាព និងមានបរិយាបន្ន ដែលគ្រប់គ្នាអាចធ្វើជាខ្លួនឯង ស្របពេលដែលស្វែងយល់អំពីអ្នកផ្សេងទៀត។ នេះហើយគឺជាគោលបំណងរបស់គោលការណ៍ណែនាំសហគមន៍ទាំងនេះ–ពោលគឺកំណត់ការរំពឹងទុកចំពោះអាកប្បកិរិយារបស់អ្នករាល់គ្នា ទាំងនៅលើ និងនៅក្រៅកម្មវិធីនេះ។ សូមអានបន្ត៖ ការមិនអនុវត្តតាមគោលការណ៍ណែនាំទាំងនេះអាចនាំឲ្យមានផលវិបាកជាក់ស្តែងផ្សេងៗ រាប់ចាប់ពីការរំលឹក រហូតដល់ការហាមឃាត់តែម្តង។

ច្បាប់របស់ Tinder៖

1. ការគិតគូរពីព្រំដែន។ កម្រិតផាសុកភាពខុសគ្នាពីមនុស្សម្នាក់ទៅមនុស្សម្នាក់។ ហេតុនេះហើយបានជាយើងមិនអនុញ្ញាតឲ្យមានរូបភាពអាក្រាត ខ្លឹមសារផ្លូវភេទ ការបង្ហាញចំណង់ផ្លូវភេទ ឬការបង្ហាញបំណងស្វែងរកការរួមភេទ នៅលើប្រូហ្វាល់សាធារណៈរបស់អ្នកទេ។ ប្រសិនបើអ្នកនៅក្នុងការសន្ទនាឯកជន ចំណុចទាំងនេះមិនចោទជាបញ្ហាទេប្រសិនបើគ្រប់ភាគីទាំងអស់មិនយល់ទាស់លើរឿងនេះទេ។ ការយល់ព្រមគឺជារឿងសំខាន់។

2. ចែករំលែកដោយប្រុងប្រយ័ត្ន និងគិតគូរឱ្យបានហ្មត់ចត់។ កុំផ្សព្វផ្សាយជាសាធារណៈនូវព័ត៌មានផ្ទាល់ខ្លួនរបស់អ្នក ឬមធ្យោបាយសម្រាប់ឲ្យអ្នកផ្សេងទៀតអាចភ្ជាប់ទំនាក់ទំនងជាមួយអ្នក (មិនត្រូវបង្ហាញជាសាធារណៈនូវព័ត៌មានដូចជា លេខទូរសព្ទ អ៊ីមែល ឬឈ្មោះអ្នកប្រើនៅលើបណ្តាញសង្គម)។ ទោះពេលណាក៏ដោយ ការចែករំលែកលេខគណនីធនាគារ ឬពាក្យសម្ងាត់អ៊ីមែលរបស់អ្នក គឺជារឿងមិនល្អនោះទេ។ ក៏មិនត្រូវសុំឱ្យអ្នកផ្សេងផ្ញើព័ត៌មានលម្អិតផ្ទាល់ខ្លួនរបស់ពួកគេមកឱ្យអ្នកដូចគ្នាដែរ។ សូមប្រុងប្រយ័ត្ន ប្រសិនបើនរណាម្នាក់ស្នើសុំឱ្យអ្នកផ្ញើប្រាក់ទៅពួកគេ ឬព្យាយាមឱ្យអ្នកធ្វើការវិនិយោគណាមួយនោះ ទង្វើបែបនេះប្រហែលជាការបោកប្រាស់។

3. ជៀសវាងខ្លឹមសារហិង្សា។ យើងលើកកម្ពស់ភាពវិជ្ជមាន ហើយនឹងមិនអត់ឱនចំពោះខ្លឹមសារហិង្សាគ្រប់ប្រភេទដែលមានឈាម សេចក្តីស្លាប់ រូបភាព ឬការពណ៌នាអំពីអំពើហិង្សា (លើមនុស្ស ឬសត្វ) ការប្រើប្រាស់អាវុធ និងអ្វីមួយដែលគាំទ្រ ឬលើកតម្កើងការបង្កគ្រោះថ្នាក់ដល់ខ្លួនឯង។

ប្រសិនបើយើងជឿថាអាចនឹងមានគ្រោះថ្នាក់ជិតមកដល់ យើងអាចនឹងចាត់វិធានការដើម្បីជាជំនួយ ដូចជាទាក់ទងដោយផ្ទាល់ជាមួយធនធានដោះស្រាយវិបត្តិ។

4. ភ្ជាប់ទំនាក់ទំនងផ្ទាល់ខ្លួន មិនមែនជាលក្ខណៈអាជីវកម្មនោះទេ កុំផ្សាយពាណិជ្ជកម្ម ផ្សព្វផ្សាយ ចែករំលែកឈ្មោះអ្នកប្រើនៅលើបណ្តាញសង្គមរបស់អ្នក ដើម្បីទទួលបានអ្នកតាមដាន លក់ផលិតផល រៃអង្គាសប្រាក់ ឬធ្វើយុទ្ធនាការ។ នេះក៏មានន័យថា Tinder មិនមែនជាកន្លែងសម្រាប់ការងារផ្លូវភេទ សេវាកំដរ ឬទំនាក់ទំនងរកស៊ីផ្លូវភេទក្នុងប្រភេទណាមួយនោះដែរ។ ដូច្នេះ ដាច់ខាត មិនត្រូវប្រើ Tinder ដើម្បីស្វែងរកស្ដ្រីចិញ្ចឹមប្រុសក្មេងសម្រាប់អ្នកឡើយ។

5. ត្រឹមធ្វើអ្វីដែលជាខ្លួនអ្នកជាការស្រេច។ មនុស្សចង់ជួបអ្នកជាចរិតពិតរបស់អ្នក។ មិនមែនចរិតក្លែងក្លាយរបស់អ្នកនោះទេ។ កុំបង្កើតគណនីក្លែងក្លាយ ឬធ្វើពុតជាមនុស្សម្នាក់ដែលមិនមែនជាអ្នក ទោះបីវាគ្រាន់តែដើម្បីការកម្សាន្តសប្បាយក៏ដោយ។

6. ប្រាស្រ័យទាក់ទងគ្នាដោយការគោរព។ ការនិយាយរកមនុស្សថ្មីៗអាចជារឿងពិបាកមួយ ជាពិសេសនៅពេលដែលអ្នកកំពុងប្រាស្រ័យទាក់ទងជាមួយមនុស្សមកពីគ្រប់មជ្ឈដ្ឋាន។ ដូច្នេះ សូមគោរពគ្នាទៅវិញទៅមក។

ប្រសិនបើការសន្ទនាមានការខុសឆ្គងដោយនឹកស្មានមិនដល់ ហើយអ្នកឃើញថាខ្លួនអ្នកមានការខកចិត្ត ឬមានអារម្មណ៍ខឹង សូមផ្អាកការសន្ទនា និងគិតពិចារណាមុនពេលអ្នកប្រតិកម្ម។ ការបៀតបៀន ការគំរាមកំហែង ការយាយី ការបំភិតបំភ័យ ការលាតត្រដាងព័ត៌មានសម្ងាត់បុគ្គល ការជំរិតផ្លូវភេទ ការគំរាមកំហែងហែកកេរ្តិ៍ ឬអ្វីដែលធ្វើឡើងដោយចេតនាដើម្បីបង្កគ្រោះថ្នាក់ មិនត្រូវបានអនុញ្ញាតឡើយ។

Tinder មិនមែនជាកន្លែងសម្រាប់ការស្អប់ខ្ពើមគ្នានោះទេ។ យើងនឹងមិនគាំទ្រជាដាច់ខាតចំពោះការប្រកាន់ពូជសាសន៍ ការតម្កើងខ្លួនជ្រុល ការស្អប់ខ្ពើម ឬអំពើហិង្សាដោយសារសាវតាររបស់នរណាម្នាក់ អត្តសញ្ញាណ ឬរូបរាងរបស់ពួកគេនោះទេ។ ចំណុចនេះបញ្ចូលទាំង (ជាអាទិ៍) ពូជសាសន៍ ជាតិពន្ធុ សញ្ជាតិ ស្ថានភាពអន្តោប្រវេសន៍ វណ្ណៈ សាសនា អត្តសញ្ញាណយេនឌ័រ និន្នាការផ្លូវភេទ ពិការភាព រូបរាងកាយ ឬស្ថានភាពសុខភាពរបស់នរណាម្នាក់។ ប្រសិនបើអ្នកឃើញនរណាម្នាក់ដែលមិនត្រូវតាមលក្ខខណ្ឌផ្ទាល់ខ្លួនរបស់អ្នកទេ សូមកុំចុចចូលចិត្តគេ ឬឈប់ផ្គូផ្គងតែម្តង រួចបន្តទៅមុខទៀត។ កុំរាយការណ៍ពីពួកគេ លើកលែងតែអ្នកគិតថាពួកគេបានបំពានគោលការណ៍របស់យើង។

7. ប្រកាន់ខ្ជាប់នូវអំពើល្អ មិនបង្កគ្រោះថ្នាក់។ យើងនឹងមានវិធានការយ៉ាងម៉ឺងម៉ាត់បំផុតចំពោះសកម្មភាព ឬអាកប្បកិរិយាទាំងឡាយដែលនាំឱ្យធ្វើឱ្យមាន មានចេតនា ឬបង្កគ្រោះថ្នាក់ដល់អ្នកប្រើផ្សេងទៀត មិនថានៅលើអនឡាញ ឬនៅក្រៅ ដោយផ្ទាល់ ឬលក្ខណៈឌីជីថលនោះទេ។ ចំណុចនេះរួមបញ្ចូលទាំងការអំពាវនាវ ឬការញុះញង់ឱ្យមានគ្រោះថ្នាក់ផងដែរ។

ប្រសិនបើអ្នករងការឈឺចាប់ដោយសារនរណាម្នាក់នៅលើ Tinder៖ ទីមួយ សូមថែរក្សាខ្លួនអ្នក ហើយទីពីរ ចំណាយពេលខ្លះដើម្បីសម្រេចថាតើអ្នកត្រូវព្យាបាលត្រង់កន្លែងណា ដូចជាវិធានស្ដីពីការទទួលខុសត្រូវ ការបញ្ចេញឲ្យដឹង ការគាំទ្រ ឬចំណុចទាំងអស់ខាងលើ។ ប្រសិនបើវារួមបញ្ចូលការរាយការណ៍ពីគ្រោះថ្នាក់ដល់ពួកយើង សូមទាក់ទងមកយើង។ យើងនៅទីនេះសម្រាប់អ្នក។

8. សម្រាប់តែមនុស្សពេញវ័យប៉ុណ្ណោះ។ អ្នកត្រូវតែមានអាយុចាប់ពី 18 ឆ្នាំឡើងទៅ ទើបប្រើ Tinder បាន។ នេះក៏មានន័យថា យើងមិនអនុញ្ញាតឱ្យមានរូបថតអនីតិជនថតតែម្នាក់ឯង ឬដោយគ្មានសម្លៀកបំពាក់នោះដែរ រួមទាំងរូបថតរបស់អ្នកកាលពីក្មេងផង ទោះជាកាលពីក្មេង អ្នកគួរឱ្យស្រលាញ់ខ្លាំងប៉ុនណាក៏ដោយ។

9. គោរពតាមច្បាប់។ មិនអនុញ្ញាតឱ្យមានខ្លឹមសារ ឬសកម្មភាពខុសច្បាប់ណាមួយជាដាច់ខាត។ នេះមានន័យថា អ្នកមិនអាចប្រើ Tinder ដើម្បីទិញ ឬលក់ថ្នាំញៀន ឬទំនិញក្លែងក្លាយ ឬស្នើសុំជំនួយដើម្បីជួយអ្នកប្រព្រឹត្តអំពើល្មើសច្បាប់នោះឡើយ។ យើងនឹងមិនអត់ឱនឱ្យនរណាម្នាក់ដែលប្រើ Tinder ដើម្បីគាំទ្រ ឬចូលរួមក្នុងការបង្កគ្រោះថ្នាក់ណាមួយដែលពាក់ព័ន្ធនឹងអនីតិជន ឬការជួញដូរមនុស្សជាដាច់ខាត។

10. មនុស្សម្នាក់ គណនីមួយ។ គណនីនីមួយៗអាចមានម្ចាស់តែម្នាក់ប៉ុណ្ណោះ។ ដោយសារមូលហេតុភស្តុភារកម្ម និងឯកជនភាព យើងមិនអាចគាំទ្រឱ្យមនុស្សច្រើននាក់អាចចូលទៅប្រើគណនីតែមួយបានទេ។ បុគ្គលម្នាក់ៗ ត្រូវមានគណនីផ្ទាល់ខ្លួនរបស់ពួកគេ។ មនុស្សម្នាក់ក៏មិនអាចមានគណនីលើសពីមួយក្នុងពេលតែមួយផងដែរ។

11. នេះគឺជាកន្លែងរបស់អ្នក ដូច្នេះ ត្រូវបង្ហោះខ្លឹមសារផ្ទាល់ខ្លួនរបស់អ្នក។ កុំបង្ហោះរូបភាព ឬសារឯកជនពីអ្នកដទៃ លើកលែងតែអ្នកបានទទួលការយល់ព្រមឱ្យធ្វើបែបនេះ។ កុំបង្ហោះស្នាដៃដែលជាប់សិទ្ធិអ្នកនិពន្ធ ឬជាប់ពាណិជ្ជសញ្ញារបស់អ្នកដទៃ។

12. ធ្វើជាអ្នកប្រើ Tinder ដែលល្អ។ កុំបំពាន Tinder។ កុំប្រើ Tinder ដើម្បីផ្សព្វផ្សាយព័ត៌មានមិនពិត ឬបំភាន់។ កុំផ្ញើតំណដែលបង្កគ្រោះថ្នាក់ ឬខ្លឹមសារដែលមិនបានស្នើសុំ។ កុំបង្កើតគណនីច្រើន។ កុំប្រើ Tinder ដើម្បីក្លែងបន្លំ បោក ឬធ្វើឱ្យមនុស្សផ្ញើប្រាក់ឱ្យអ្នក ឬធ្វើរឿងអ្វីផ្សេងទៀត។ មិនជាបញ្ហានោះទេក្នុងការជជែកជាមួយមិត្តភក្តិ និងក្រុមគ្រួសារអំពីមនុស្សដែលអ្នកជួប ប៉ុន្តែកុំចែករំលែកព័ត៌មានរបស់នរណាម្នាក់ផ្សេងទៀតជាសាធារណៈ។ កុំធ្វើការរាយការណ៍មិនពិត បំភាន់ ឬក្នុងចេតនាអាក្រក់។ កុំប្រើកម្មវិធីភាគីទីបី ឬបច្ចេកវិទ្យាផ្សេងទៀត ដើម្បីដោះសោមុខងារ ឬលលេងនឹងប្រព័ន្ធនេះ។ កុំបៀតបៀន គំរាមកំហែង ឬបំពានវិធានទាំងនេះ នៅពេលនិយាយដោយផ្ទាល់ជាមួយ Tinder, Match Group ឬបុត្រសម្ព័ន្ធរបស់ក្រុមហ៊ុន។

13. បន្តតាមដានដើម្បីរក្សាភាពសកម្ម។ ប្រសិនបើអ្នកមិនបានចូលគណនី Tinder របស់អ្នកក្នុងរយៈពេលពីរឆ្នាំ យើងនឹងសន្មតថា គណនីនោះមិនត្រូវបានប្រើ ហើយអាចនឹងលុបគណនីនោះចោលដោយសារគ្មានសកម្មភាព។ ដូច្នេះ ប្រសិនបើអ្នកចង់ឱ្យគេឃើញនៅក្នុងកម្មវិធីនេះ គ្រាន់តែចូលគណនីម្តងម្កាលក៏បាន។

ការរាយការណ៍

ក្នុងនាមជាសមាជិកនៃសហគមន៍ Tinder យើងលើកទឹកចិត្តឲ្យអ្នកហ៊ានបញ្ចេញមតិ និងហ៊ាននិយាយ។ ប្រសិនបើនរណាម្នាក់កំពុងបង្កគ្រោះថ្នាក់ដល់អ្នក ឬកំពុងបំពានគោលការណ៍ណែនាំសហគមន៍របស់យើង សូមរាយការណ៍ពីបញ្ហានោះ។ ការរាយការណ៍របស់អ្នកត្រូវបានរក្សាជាការសម្ងាត់ជានិច្ច។ តាមរយៈការរាយការណ៍ អ្នកអាចជួយយើងបញ្ឈប់អាកប្បកិរិយាដែលបង្កគ្រោះថ្នាក់ និងការពារអ្នកដទៃ។

ផលប៉ះពាល់

យើងយកចិត្តទុកដាក់យ៉ាងខ្លាំងលើគោលការណ៍ណែនាំសហគមន៍របស់យើង និងផលប៉ះពាល់របស់វាលើសហគមន៍របស់យើង។ យើងនឹងធ្វើអ្វីគ្រប់បែបយ៉ាងតាមដែលអាចធ្វើទៅបាន ដើម្បីធានាថាមនុស្សទាំងឡាយអនុវត្តតាមគោលការណ៍ណែនាំនេះ។ យើងបំពាក់នូវប្រព័ន្ធព្រមានមួយ ប៉ុន្តែប្រសិនបើការបំពាននៅតែបន្ត ឬការបំពានមានលក្ខណៈធ្ងន់ធ្ងរ យើងនឹងឆ្លើយតបទៅតាមនោះដែរ។

យើងរក្សាសិទ្ធិក្នុងការស៊ើបអង្កេត និង/ឬបញ្ចប់គណនីទាំងឡាយដោយមិនមានការសងប្រាក់វិញលើការទិញណាមួយឡើយ ប្រសិនបើយើងរកឃើញថាអ្នកបានប្រើប្រាស់សេវាកម្មដោយមិនត្រឹមត្រូវ ឬបានប្រព្រឹត្តក្នុងលក្ខណៈមួយដែល Tinder ចាត់ទុកថាមិនសមរម្យ មិនស្របច្បាប់ ឬបំពានលើគោលការណ៍ណែនាំសហគមន៍ ឬលក្ខខណ្ឌប្រើប្រាស់របស់យើង រួមទាំងសកម្មភាព ឬការប្រាស្រ័យទាក់ទងដែលកើតឡើងក្រៅសេវាកម្ម ប៉ុន្តែពាក់ព័ន្ធនឹងអ្នកផ្សេងទៀតដែលអ្នកជួបតាមរយៈសេវាកម្ម។